حبيبتي إزيك ؟؟؟؟ واحشاني قوي ، عارفه!، إنا كده بقالي 5 شهور وأسبوعين وثلاث أيام مشفتكيش..وحشتيني فوق ما تتصوري..عارفه النهاردة كام ؟ النهاردة 20/12 كنا كل سنة بنحتفل باليوم ده...ده أول يوم شوفتك فيه في حياتي من 8 سنين لما كنتي لسه داخله الجامعة جديد ومش عارفه أي حاجة....كنتي بريئة جداً وكلك حيوية وطفولة...فاكرة لما كنا بننزل اليوم دة كل سنة ونحتفل بيه بره...كنت بخدك في حضني وإحنا ماشين وبحس إنك ملكت الدنيا كلها...لما كنا بننزل نتمشى على كوبري 26 يوليو أو كوبري أكتوبر باليل و البرد جامد قوي...وتقوليلي أنا بردناه قوي وأبقى عاوز أخدك جوه قلبي علشان أحميكي من البرد أو إن نسمة هوا تيجي تديقك....فاكرة لما أول مرة نحتفل باليوم ده وإحنا مخطوبين ....بابباكي يومها وافق إنك تنزلي معايا بالعافيه وكان مصر إن أختك تنزل معانا بس أختك طلعت جدعه وإتحججت ومجتش، فاكره لما كنا نركب العربية نقفل الشببيك ونشغل منير ونسمعوا....لما يغني حواديت ولا المريلة الكحلي ، ولا أغنية نفس الإحساس لوجيه عزيز ...كنا بنغني معاه بصوت عالي ولا لما كان يغني منير ويقول أنا قلبي برج حمام...يااااااه.... كنا بنقول وراه بصوت عالي قوي لدرجة إن الناس كانت بتسمعنا من ورا قزاز العربية المقفول ويدحكوا علينا هاهاهاها ...وفي عز البرد وقفل الشباك كان بيتكون على القزاز بخار الميه كنتي بتيجي بصوبعك الرقيقه وترسمي قلب وجنبه أول حرف من إسمنا أو بترسمي وردة و أ شكال تانية كتير...كنتي فنانة بجد...فاكرة بعد ماإتجوزنا لما كنت بجيبلك البطاطا السخنة ونا مروح من الشغل من على العربية اللي على ناصية شارعنا....أنا أصلاً مش بحب البطاطا بس مجرد إني أدخل البيت وتنزلي تحت البطانية في عز البرد و تعودي تاكليها إنتي بحس بسعادة متتوصفش إنك سعيدة ومستمتعة بالبطاطا...كنت بحس بسخونة البطاطا في قلبي من شدة سعادتك بيها...كنتي تحبي تكليها بمزاج الأطراف كلها الأول وبعد كده القلب علشان القلب طعم وبتحلي بيه في الأخر....فاكرة في أيام تعبك الشتا اللي فات ... قضينا العيد سنتها في البيت...كنتي جميلة قوي يومها... قريت فعنيكي ساعتها حزن أكبر من حزن الدنيا كله....إبتسامتك وإنتي بتبكي كانت جميلة قوي زيك...بريئة قوي....فاكرة آخر مره شفتك فيها لما قعدتي تعيطي وتقوليلي متسبنيش وتدفني راسك في حضني وتعيطي...... واحضنك جامد علشان متحسيش بالشعور إن إنتي لوحدك.....دلوقتي ....أنا لوحدي ....سبتيني ومشيتي....أنا اللي مهون عليا إني واثق إن إنتي في مكان أحسن من اللي كنتي فيه ومع ناس أحسن من اللي كنتي عايشه معاهم علشان الدنيا ماكنتش مكانك الصح....إنتي ملاك وعاش بين البشر... و بعدين إنتي عند ربنا اللي أعطف وأحن عليكي مني ومن كل الناس....الله يرحمك
وحشتيني قوي.
